4. โสปากตฺเถรคาถา
[480]
‘‘ทิสฺวา ปาสาทฉายายํ, จงฺกมนฺตํ นรุตฺตมํ;
ตตฺถ นํ อุปสงฺกมฺม, วนฺทิสฺสํ [วนฺทิสํ (สี. ปี.)] ปุริสุตฺตมํฯ
[481]
‘‘เอกํสํ จีวรํ กตฺวา, สํหริตฺวาน ปาณโย;
อนุจงฺกมิสฺสํ วิรชํ, สพฺพสตฺตานมุตฺตมํฯ
[482]
‘‘ตโต ปญฺเห อปุจฺฉิ มํ, ปญฺหานํ โกวิโท วิทู;
อจฺฉมฺภี จ อภีโต จ, พฺยากาสิํ สตฺถุโน อหํฯ
[483]
‘‘วิสฺสชฺชิเตสุ ปญฺเหสุ, อนุโมทิ ตถาคโต;
ภิกฺขุสงฺฆํ วิโลเกตฺวา, อิมมตฺถํ อภาสถ’’ฯ
[484]
‘‘ลาภา องฺคานํ มคธานํ, เยสายํ ปริภุญฺชติ;
จีวรํ ปิณฺฑปาตญฺจ, ปจฺจยํ สยนาสนํ;
ปจฺจุฏฺฐานญฺจ สามีจิํ, เตสํ ลาภา’’ติ จาพฺรวิฯ
[485]
‘‘อชฺชตคฺเค มํ โสปาก, ทสฺสนาโยปสงฺกม;
เอสา เจว เต โสปาก, ภวตุ อุปสมฺปทา’’ฯ
[486]
‘‘ชาติยา สตฺตวสฺโสหํ, ลทฺธาน อุปสมฺปทํ;
ธาเรมิ อนฺติมํ เทหํ, อโห ธมฺมสุธมฺมตา’’ติฯ
… โสปาโก เถโร…ฯ
5. สรภงฺคตฺเถรคาถา
[487]
‘‘สเร หตฺเถหิ ภญฺชิตฺวา, กตฺวาน กุฏิมจฺฉิสํ;
เตน เม สรภงฺโคติ, นามํ สมฺมุติยา อหุฯ
[488]
‘‘น มยฺหํ กปฺปเต อชฺช, สเร หตฺเถหิ ภญฺชิตุํ;
สิกฺขาปทา โน ปญฺญตฺตา, โคตเมน ยสสฺสินาฯ
[489]
‘‘สกลํ สมตฺตํ โรคํ, สรภงฺโค นาทฺทสํ ปุพฺเพ;
โสยํ โรโค ทิฏฺโฐ, วจนกเรนาติเทวสฺสฯ
[490]
‘‘เยเนว มคฺเคน คโต วิปสฺสี, เยเนว มคฺเคน สิขี จ เวสฺสภู;
กกุสนฺธโกณาคมโน จ กสฺสโป, เตนญฺชเสน อคมาสิ โคตโมฯ
[491]
‘‘วีตตณฺหา อนาทานา, สตฺต พุทฺธา ขโยคธา;
เยหายํ เทสิโต ธมฺโม, ธมฺมภูเตหิ ตาทิภิฯ
[492]
‘‘จตฺตาริ อริยสจฺจานิ, อนุกมฺปาย ปาณินํ;
ทุกฺขํ สมุทโย มคฺโค, นิโรโธ ทุกฺขสงฺขโยฯ
[493]
‘‘ยสฺมิํ นิวตฺตเต [ยสฺมิํ น นิพฺพตฺตเต (ก.)] ทุกฺขํ, สํสารสฺมิํ อนนฺตกํ;
เภทา อิมสฺส กายสฺส, ชีวิตสฺส จ สงฺขยา;
อญฺโญ ปุนพฺภโว นตฺถิ, สุวิมุตฺโตมฺหิ สพฺพธี’’ติฯ
… สรภงฺโค เถโร…ฯ
สตฺตกนิปาโต นิฏฺฐิโตฯ
ตตฺรุทฺทานํ –
สุนฺทรสมุทฺโท เถโร, เถโร ลกุณฺฑภทฺทิโย;
ภทฺโท เถโร จ โสปาโก, สรภงฺโค มหาอิสิ;
สตฺตเก ปญฺจกา เถรา, คาถาโย ปญฺจติํสตีติฯ
8. อฏฺฐกนิปาโต